Жазғы мектептің мақсаты – оқушылардың тілдік және сөздік, сонымен қатар ойлау қабілеттерін сабақ және ойын іс-әрекеті арқылы жүзеге асыру. Атаулы жұмыс біздің мектепте екі бағытта іске асып жатыр. Бірі дарынды оқушылармен жұмыс болса, екіншісі үлгерімі төмен оқушылармен жұмыс. Осы мүмкіндікті пайдаланып білімін шыңдауға келген оқушылар үшін ыңғайлы кесте құрылып, қызықты форматта сабақтар ұйымдастырылған. «Оқуға құштар мектеп» жобасы бағытындағы дәрістер, шахмат, теннис, ғылыми жұмыстарға дайындық , логика әлемі мен медиа сауаттылық, дебат, сөз өнері сияқты түрлі қызықты сабақтар жүзеге асуда. Оқушылар сабаққа дүйсенбіден жұмаға дейін қатысады. Бұл балалар үшін жақсы мүмкіндік. Себебі әр оқушы біліміндегі олқылықтардың орнын толтырып, жаңа білім алады. Сонымен қатар сабақтар музейлерде, таза ауада өткізіліп, әртүрлі экскурсиялар жоспарланған. «Білекті бірді жығады, білімді мыңды жығады» демекші қазіргі таңда білімдінің алды жарық. Жетер биігі де жоғары. Сондықтан келешек ұрпақтың жан-жақты білімді болуы елдің басты мүддесі болып табылады.
